Die eerste 10 jaar

Bloot prikkels om die herinnering in te skop.
En moenie huiwer om aan te vul nie.

1963

• Die Hoërskool Menlopark open met 371 leerlinge, 12 personeel en 12 voltooide klaskamers.
• Maretha Coetzee (onderhoofmeisie in 1965) is die eerste leerling wat die Menloparkse Hoërskool inskryf.
• Die skool word op 1 November amptelik in gebruik geneem, die nuwe aanbouings op 18 September 1971.

1964

• Die “Kwêvoel”, ons eerste tydskrif/jaarblad verskyn. Dis 17 getik en afgerolde bladsye dik en kos 5c.

1965

• Die hokkkieseisoen eindig met ‘n wedstryd teen die onnies — die onnies wen 1-0.
• Die eerste Eggo sien die lig, vier uitgawes elke jaar. Dis nou 24 bladsye dik en kos steeds 5c.
• Die skool het sy eerste matrikulante, hulle het in standerd 8 (graad 10) saam met die skool begin.
• Op 1 Maart word elke leerling in die skool se tande deeglik deur ‘n provinsiale geneeskundige span ondersoek.
• Standerd 10A1 val die besondere eer te beurt om R34-60 met hul Vrydag koekverkoping in te samel.
• Die eerste Afrikaanse debatsaand vind plaas. Die onderwerp:  Wat is die beste troeteldier, ‘n kat of ‘n hond?
• Die vise-hoof, Mnr JJ Botha, skryf die skool se amptelike skoollied.
• 18 rugbyspelers toer deur SWA (Namibië), hulle wen een van hul vier wedstryde
• Deetlef Prozesky word die eerste matrikulant met sewe onderskeidings— hy ontvang ‘n kontantbedrag van die bank.

1966

• Jannie Louw en Gustav Joyce word die eerste seuns om in twee sportsoorte Noord-Transvaalse kleure te verwerf.
• Pieter van Niekerk word gekies as die aanvangskolwer vir die Afrikaanse Stadsskole Nuffield-kompetisie.
• Die eerste Menlovaria-aand word gehou. Daar was destyds nog ‘n Volkspele-afdeling.
• Claudie van Straaten (later Springbokatleet) stel haar eerste, van talle skolerekords, op.

1967

• Die skool se eerste standerds sesse is vanjaar in matriek.
• Jeanne Bathgate is die eerste Standerd 6-leerling wat by die Menloparkse Hoërskool inskryf.
• Die Hoërskool Menlopark wen sy eerste Transvaalse administrateursbeker — vir gimnastiek.
• Die padpatrollie, wat toesien dat die leerders ongelukvry die pad oorsteek, staan 22 seuns sterk.
• Na Vrydagaand se afskeid word al die matrieks Saterdag Hartebeespoortdam toe gery met die bus vir ‘n vrugtefees.
• Die skool se eerste  kermis, met tombola, ‘n spookhuis, kussinggevegte en baie kos, samel R3 000 in.
• Die Hoërskool Menlopark wen vir die eerste keer die Atletiek interhoërkmpetisie op Pilditch.

1968

• Die matriekafskeid (in die skoolsaal) het die ruimte-eeu as tema — die kunsleerlinge sorg vir die versiering.
• Die skool in R 5 024-00 aan skoolfonds, die skool se vervoeruitgawes vir die hele jaar beloop R761-66.
• Die matriekdans word in die Duitse Klubsaal gehou, ‘n onderwyser, Mnr Goris, en sy orkes sorg vir die musiek.

1969

• Die Hoërskool Menlopark kry na ses jaar sy eerste adjunkhoof, Mnr R G Visagie.
• Pierre Cilliers wen die junior afdeling van die Transvaalse latyn-leeskompetisie.
• Die skool het na ses jaar reeds R108-69 gespaar vir die swembadfonds.

1970

• P van Schaik word die eerste Voortrekker aan wie ‘n Presidentsverkennerstoekenning gemaak word.
• Annemarie du Toit en Pierre Beukes se skoolromanse is die eerste wat uithou en Desember op ‘n huwelik uitloop.
• Claudie van Straaten word die vinigste dogter in haar ouderdomsgroep ter wêreld.
• Pierre Cilliers behaal die hoogste punte in matriek van alle Afrikaanssprekendes in Transvaal.
• Lynnpark slaghuis skenk R25-00 aan die skoolfonds en word in die jaarblad amptelik daarvoor bedank.

1971

• Daar word fluks gevorder met die bou van die skoolsaal adminsitratiewe blok en 18 nuwe klaskamers.
• Die Hoërskool Menlopark se judoklub word gevestig met Barend Schutte (oud-Sa-kampioen) as hulpafrigter.
• Ons kry ons heel eerste dogters drilpeloton en op 26 Oktober marsjeer hul saam met die seuns en die kadetorkes.
• Die tweedehandse boeketafel sorg vir bykans 10% van die kermis se totale inkomste — R108-00 uit R1 800.

1972    

• Die olimpiese standaard swembad word ingebruik geneem.
• Die Hoërskool Menlopark het R50-77 in sy spaarrekening en netbal toon ‘n inkomste van R14-45.
• ‘n Blokkiesraaiselkompetisie samel R5 000-00 skoolfonds in, die prys uitgeloof was ‘n splinternuwe motorvoertuig.
• Skoliere kla dat hulle nie weet wat om Saterdae-aande te doen nie — die skool reël ‘n skyfievertoning oor Rooi Sjina.
• Motorafdakke word teen R15-00 aan personeellede verkoop — as hy/sy verplaas word, word dit herverkoop.
• Addisionele Wiskunde (ook genoem Differensiaal- en inbegraalrekening) word as sewende vak ingevoer.